P3M nga pilit gisakmit

CEBU, Philippines - Kapin usa ka libo ka sakong imported nga pilit nga giingong ilegal nga migamit og ‘label’ sa pangalan sa laing brand nga gibana-banang nagkantidad og P3 milyones gikan sa unom ka mga rice dealers ang gisakmit sa National Bureau of Investigation (NBI) Central Visayas atol sa gihimong ronda kagahapon sa buntag.

Si NBI Supervising Agent Atty. Jose Ermie Monsanto nagkanayon, ang tag-iya sa Corona rice nga si Judelyn Lim mireklamo bahin sa ilegal nga pilit nga nagdala sa brand sa ilang sako.

Ang ronda pinasikad sa search warrant nga giisyu ni Judge Ramon Daomilas Jr. sa Regional Trial Court Branch 11 batok sa dealer sa WRFA Commodities nga nahimutang sa Arellano Boulevard, Pier 4, ning dakbayan nga gipanag-iya ni Francisco Ang.

Si Monsanto mitug-an sa mga tigbalita nga ang ‘Crown’ makapaduda sanglit susama ra og logo sa nakarehistro nga Corona brands.

“We could just have two sacks for investigation but we have to get everything to satisfy the complainant,” dugang pasabot ni Monsanto.

Laing mga dealers nga gironda mao ang Master Grosser nga gipanag-iya ni Juvy Tuwala; V and H nga gipanag-iya ni Vincent Chan ug EBT gipanag-iya usab ni Angeline Tan, parehong nahimutang diha sa dakbayan sa Mandaue.

Laing gironda mao ang Wensor Trading diha sa Mabolo nga gipanag-iya ni Marriane Dy ug HWL Trading nga nahimutang diha sa Tabo-an Public Market nga gipanag-iya ni Lanie Co.

Ang WRFA Commodities nga gipanag-iya ni Francisco Ang miingon nga wala gyud siya mahibalong ang ilang gibaligya nga bugas usa diay kini ka illegal. “Ahente ra man gud na ang nakigsabot nako, igo ra sad ko mibayad, wa ko kahibaw nga ilegal diay ni,” dugang pa niya sa mga tigbalita.

Sa dihang gikuhaan og reaksyon ang duha ka representante sa Corona nagdumili kini paghatag og komentaryo.

Si Monsanto nagkanayon nga ilaha pang ilhon kun si kinsa ang tag-iya sa Crown aron ila kining mapasakaan og kasong kriminal. Ang 1,150 ka sakong bugas kasamtangan karung gikustodiya sa NBI-7. – BANAT NEWS