CEBU, Philippines - Wa pay natumbok nga mga suspek ang kapolisan sa dakbayan sa Toledo kalabot sa mipatay sa usa ka mahuyang didto sa barangay Matab-ang sa maong dakbayan sa miaging Martes sa kaadlawon.
Si SPO4 Gil Lastimosa , desk officer sa Toledo City Police Station mibutyag sa Banat News nga ilang gisusi karon ang mga taho nga may labot kuno sa ginadiling drugas ang maong krimen.
Si Mark Jun Doleno, 19, ulitawo , anak ni retired Police Insp. Felicisimo Doleno, nga taga sitio Dakit, barangay Awihaw, sa maong dakbayan kinsa gibanhigan ug gitusak sa mga bala samtang nagsakay kini sa iyang motorsiklo didto sa Matab-ang.
Ang angkas niya nasalbar kay wala maigo sa mga bala ug nakadagan kini.
Matud pa ni Lastimosa nga wala silay laing nakitang anggulo sa maong kaso sanglit dili salawayon ang pamilya sa biktima.
Ang mga nakasaksi sa hitabo mibutyag nga duha ka wala hiilhing tawo ang mibanhig ug miluthang sa biktima apan wala nila kini hiilhi. Sa pagkakaron padayon gipangita sa kapolisan ang mga kriminal. – BANAT NEWS