Tulisan gidaganan sa drayber

CEBU, Philippines - Usa ka taxi drayber ang giilogan sa iyang gimanehong taxi sa iyang pasahero nga tulisan kagahapon sa kaadlawon human gitionan og armas ang biktima   diha sa Sudlon sa barangay Lahug ning dakbayan.

Nagkara-kara nga misumbong sa kapulisan sa Mabolo Police Station si Harry Pacquibot nga taga Mambaling ug drayber sa Juscar Taxi nga nagtangag sa plakang GXJ-943 nga dunay body number 5519.       

Human gikareport sa drayber daling gialarma sa Mobile Patrol Group ang maong taxi apan pagkaalas-5 na pasado nakit-an ang taxi nga didto giabandonar sa tulisan nga gi-parking kilid sa kanhi Bagong Buhay Rehabilitation Center.

 Usa ka Nestor Quijada maoy unang nakakita sa taxi nga nagparking ug daling mipahibalo sa mga gwardya diha sa I.T. kinsa daling gi-cordon ang area ug nanawag dayon sa kapulisan.   

Si Pacquibot nga na-interbyu sa mga tigbalita mitug-an nga misakay kaniya ang maong lalaki diha sa Mandaue City ug nagpahatud diha sa I.T Park sa barangay Apas.                   

Sa dihang naabot na sila, kalit lang miingon ang iyang pasahero nga duna kini nabiyaan hinungdan nga gisukna ni Pacquibot nga mobalik sila sa agi apan gimanduan hinuon siya nga molahos nalang sa Sudlon.           

Matud ni Pacquibot nga pag-abot nila sa atbang sa karaang Cebu Provincial Police Office gimanduan siya nga pahunongon sa daplin.  

 Dihadiha kalit lang siyang gitionan og .45 nga kalibre sa armas ang iyang kilid dayon nangutana asa ang kuwarta dungan sa pagdeklarar og tulis.   

Gumikan sa kahadlok ug karatol sa biktima dali niining giablihan ang pultahan ug midagan.   

Matud ni Pacquibot nga gimaneho sa tulisan ang taxi samtang siya nangita og habal-habal aron mosumbong sa kapulisan.              

 Atol sa gihimong pakisusi sa mga sakop sa CSI ug Theft and Robbery Section nasuta nga dunay duha ka bala sa .45 pistol diha sa lingkoranan sa front seat. Wala hinuon makuha sa tulisan ang kuwarta sa drayber nga nagkantidad og P1,380. (BANAT)