CEBU, Philippines - Naligo sa kaugalingong dugo ang kanhing reporter sa usa ka sibyaanan ug karon giingong usa na ka police asset human kini gipusil kagahapon sa Kakai Refreshment and Billiard Hall sa Sansan Road sa barangay Lahug pasado alas 6:40 sa kagabhion.
Ang biktima mao si Jufel Puyod, 35, mao nay caretaker sa nahisgutang establisamento ug molupyo sa sitio Ponce sa barangay Carreta ning dakbayan.
Duha ka wala mailhing mga batan-ong lalaki ang gitumbok nga mipusil sa biktima. Sumala pa sa saksi nga nagtangag og labakara ang drayber sa XRM nga kolor blue nga getaway vehicle samtang nagsuot ang gunman ug ang drayber og puti nga t-shirts ug short pants.
Sa imbestigasyon sa Homicide Section si Puyod nakaangkon og samad pinusilan sa ulo nga nakaingon sa hinanali niining kamatayon.
Nasuta usab nga si Repuela usa ka police asset sa Mabolo Police Station ug kanhi reporter sa Aksyon Radyo kaniadto.
Matud pa ni PO3 Victor Ayuman sa pakighinabi sa Banat News, ang live-in partner sa biktima nga si Jenny Jalma-ani misugo sa biktima nga magpailis sa 100 pesos sa tag 5 pesos aron ihulog sa videoke.
Samtang ang biktima nagpasensilyo si Jalma-ani miadto sa kusina aron manglimpyo apan mao nalang iyang nadunggan ang usa ka buto sa armas gikan sa gawas.
Daling migawas si Jalma-ani aron susihon ang buto apan mao nalang iyang nakita ang nagkadugong patay’ng lawas sa biktima nga adunay pinusilan sa ulo.
Usa ka testigo ang naatol nga naagi sa maong dapit ang mibutyag nga nakadungog kini og buto dayon ang usa ka wala mailhing lalaki nga nagdali pagsakay sa motorsiklo nga XRM ug mipasutoy og dagan subay sa Gorordo Avenue.
Matud pang Ayuman ilahang gitutukan karong posibleng motibo sa maong krimen ang pagka-impormante sa biktima ilabi na may kalambigitan sa kampanya batok sa ilegal nga drugas ug posibleng adunay nasilo niini. (BANAT)