Huramentado gibantayan

CEBU, Philippines - Gikabalak-an sa kapolisan sa dakbayan sa Lapulapu nga posibleng manghagis lang gihapon ang naghuramentadong gipriso nila karong wala lang gihapon kini sa iyang kaugalingon.

Ang maong kabalaka gibutyag kagahapon ni Sr. Supt. Mariano Natuel , hepe sa Lapulapu City Police Station kinsa nagkanayon nga higpit nilang gibantayan si Rosalio Tariman, 22,  nga nakaluba og pito ka tawo atol sa piyesta sa maong dakbayan niadtong Domingo.

Si Tariman kinsa samdan og gamay sa bala sa iyang walang abaga, nga maoy nakapakalma kaniya gikan sa pagpanunggab, wala magdugay sa tambalanan ug gipaslak dayon siya sa prisohan sa kapolisan.

Matud pa ni Natuel nga naklaro nila nga libog lang gihapon ang utok ni Tariman kinsa taga Aurora, Zamboanga City kay dili man kini moharong sa pagpakigsulti kanila.

Si Natuel miingon nga kasong frustrated multiple homicide ang ilang giandam nga ipasaka batok sa maong suspetsado

Midugang siya nga ilang gilain og selda ang maong suspetsado aron nga dili maka-angin og laing piniriso sa sulod.

Sa laing bahin dili kaayo tantong delikado ang kahimtang sa pito ka mga biktimang gipanunggab sa suspetsado kay magbaw ra ang ilang samad sa lawas.Kay ang armas nga gigamit sa suspetsado, dili talinis og tumoy kay usa man ka ighihiwa og karne ug lapad ang tumoy niini.

Matud pa ni Natuel nga suwerte kaayo nga ighihiwa og karne ang gigamit sa suspetsado kay kun talinis pa ang tumoy niini, walay siguro kun wala bay makabsan og kinabuhi sa mga biktima. Midugang si Natuel nga malinawon unta ang piyesta sa Lapulapu kun wala pay naghuramentado. (BANATNEWS)