CEBU, Philippines - Gihipos ug gidala sa kapolisan ang usa ka lantaka nga gibiyaan sa wala hiilhing tawo didto sa Tabunok Sports Complex, sa barangay Tabunok dakbayan sa Talisay sa miaging gabii.
Kini human madawat sa kapolisan sa Talisay City Police Office ang usa ka tawag sa telepono gikan sa usa ka nagpakabana nga molupyo nga nagpahibawo nga adunay nagpabuto og lantaka didto sa nahisgutang dapit ug mireklamo kabahin sa kabanha sa maong pabuto.
Daling miresponde ang mga polis nga sila Inspector Jose Nilo Abello ug Inspector Diosdado Malazarte , apan sa pag-abot nila sa maong lugar wala nay tawo nga naabtan ang kapolisan apan ang lantaka nagpabilin pa gihapon nga nag-aso pa ang sumbohan.
Sama sa usa ka bazooka ang gidak-on sa lantaka nga nakompiskar sa mga otoridad .
Kahinumdoman nga sa milabay’ng tuig usa ka batang lalaki nga taga barangay Tangke ang namatay human mobuto ang lantaka samtang naglili siya sa sumbohan niini.
Si Superintendent Henry Biñas, hepe sa Talisay City Police Office padayon gihapon sa ilang operasyon sa pagpangimbargo og mga lantaka ilabi na kadtong pabuthon sa publikong lugar nga makahatag og kahasol sa ubang tawo. (BANATNEWS)