Nag-cutting classes 9-anyos nalumos

CEBU, Philippines - Usa ka 9-anyos nga tinun-ang giingong mi-cutting classes ang nalumos ug namatay samtang naligo sa dagat uban sa iyang mga classmate sa miaging hapon diha sa sitio Buwaran sa barangay Mambaling habig sa South Road Properties (SRP).

Ang namatay giila sa kapulisan nga mao si Jacko Arañas,9, nga taga sitio Carbares sa barangay Duljo Fatima ug grade 3 pupil sa San Nicolas Elementary School.

Ang kapulisan niimbestigar karun sa maong tunghaan kun nganong nakagawas sa tunghaan ang bata uban sa mga kauban niini.

Subay sa pasiunang imbestigasyon ni PO3 Ruth Violango ug mga kaubanan sa Homicide Section nagkuyog ang bata sa laing mga tinun-an nga nangaligo sa dagat diha sa nahisgutang lugar.

Samtang nangaligo naglumbaanay og gukod sa tsinelas ang mga bata nga ilang gipang-itsa sa lawod apan giingong naanod sa “sulog” si Arañas hinungdan sa pagkalumos niini.

Si Joel Econg, kagawad sa Duljo Fatima mitug-an sa kapulisan nga segundo lang gyud naunlod ang bata ug pagkataud-taod milutaw kini dayon.

Daling gitabang ang bata sa mga residente sa dapit ug gidala sa mga kagawad sa barangay sa Cebu City Medical Center apan namatay gyud ang bata pag-abot sa nahisgutang tambalanan.

Ang mga sakop sa Homicide Section nag-imbestigar pa hinuon sa guwardya sa maong tunghaan nganong nakalighot ang mga bata nga oras pa sa tingklase niadtong higayona.

Lakip sa susihon sa kapulisan mao ang magtutudlo tungod kay atol sa hitabo wala pa mamuhi sa dihang kini nahitabo. (BANATNEWS)