Maguindanao Massacre Media gipahimangnoang kanunayonang pagmatngon; resolusyon gipasar

CEBU, Philippines - Natatak na sa alimpatakan sa mga Filipino ug sa tibuok kalibutan ang nahitabong linuog nga krimeng nahitabo sa Maguindanao massacre nga nagsumad kagahapon, mikalas og 57 ka kinabuhi ang maong krimen ug sagad sa mga biktima mga sakop sa media.

Nunot niini, ang Police Regional Office-7 mipahigayon og “Personal Security Measure for Media Practitioners: What you should and shouldn’t do to protect yourself and your family” seminar diha sa Media Center sa Police Regional Office-7.

Ang seminar gipasiugdahan sa Police Community Relation-7 pinangulohan ni Sr. Supt. Anthony Obenza ug ni Supt. Oliver Cinco ang deputy chief sa Regional Intelligence Division.

Gitudlo sa PCR-7 pinaagi kang Cinco ang mga pamaagi sa pagmatngon sa personal nga seguridad sa usa ka mediaman diha sa iyang panimalay, trabahoan ug bisan na sa iyang palibot.

“What is at stake may not be only your life but the life of your family,” matud pang Obenza.

Samtang si Sr. Supt. Josephus Angan, ang deputy regional director for administration sa PRO-7 miingon nga ang kapolisan andam kaayong moabag sa media kun adunay mga hulga.

“Our country recognizes the freedom of expression and it is guaranteed in our Constitution as one of our rights. We have very vibrant media practitioners in the country and there are cases that we may have stepped on somebody. But don’t hesitate to call our (PNP) attention in case a threat is detected,” pasabot pang Angan.

Lakip sa mga speakers sa maong seminar ang PCR sa Cebu City Police Office nga si PO2 Raymunda Moreno kinsa mihisgot sa seguridad diha sa panimalay ug sa pamilya sa usa ka mediaman.

Samtang si Konsehal Alvin Dizon mipasar og resolusyon sa konseho sa dakbayan sa Sugbu nga nag-awhag sa korte nga tugutan ang media nga maka-live coverage sa pagdungog sa kaso sa Maguindanao Massacre.

Giawhag usab niini si Presidente Benigno ‘Noynoy’ Aquino III ug Justice Secretary Leila De Lima nga hatagan og seguridad ug proteksyon ang mga testigo sa maong masaker. (BANATNEWS)