CEBU, Philippines - Duha ka kasong carnapping ang nahitabo didto sa managsamang barangay sa lungsod sa Consolacion niadtong Domingo ug Lunes sa buntag. Ang unang biktima giila nga si Dennis Pepito, 26, lumad nga taga Barangay Pitogo.
Matud ni Pepito nga usa ka wa mailhing lalaki ang mikuha sa iyang motorsiklo nga iyang gi- parking sa gawas sa balay sa iyang ig-agaw niadtong Domingo pasado alas 11:30 sa buntag.
Didto sa iyang sakyanan nga may plakang 7-LV-933 ang iyang pitaka nga may sulod nga kwarta ug ang iyang lisensya nga nalakip usab sa maong kawat.
Ang laing gikawatan og motorsiklo mao si Ike Maglasang, hingkod nga taga barangay Pitogo gihapon kansang sakyanan gisakiyo sa wala gihapon hiilhing kawatan sayo sa buntag niadtong Lunes.
Gawas sa motorsiklo gikawat usab ang iyang computer set ug uban pang butang sulod sa ilang balay.
Sumala sa biktima nga nahinanok siya sa pagkatulog dihang gilungkab sa mga kawatan ang ilang balay hinungdan nga nadala ang iyang computer set, gawas sa iyang motor. Ang mga kapolisan sa Consolacion padayon sa ilang hot pursuit operation batok sa mga carnapper. (BANATNEWS)