Pugante nadakpan

CEBU, Philippines - Nadakpan pagbalik sa kapulisan ang usa ka pugante sa Sibonga Police Station niadtong miaging tuig ug diha madakpi sa mga sakop sa Investigation and Detective Management Branch (IDMB) sa Cebu City Police Office (CCPO) niadtong Sabado sa alas-10 sa buntag diha sa Mohon 2 sa barangay Tisa ning dakbayan.

Si Junrey Yamaro ,28, lumad nga taga Tangub City apan nagpuyo na karun sa barangay Bahay sa lungsod sa Sibonga mieskapo niadtong Disyembre 20 sa miaging tuig didto sa Sibonga police station, siya dunay kasong rape niadtong Hulyo 20 sa miaging tuig.

Ang kaso anaa sa sala ni presiding judge Maximo Perez sa RTC Branch 26 sa lungsod sa Argao sa dihang ang pag-umangkon sa iyang asawa nga nagpangidaron og 20 anyos giingong maoy mireklamo sa pagpanglugos batok sa suspek.

Segun sa report sa IMDB nga nakadawat sila og impormasyon diha sa Tisa kabahin sa presensya sa suspek hinungdan daling gihimoan nila og pakisusi gipangulohan ni Chief Insp. George Ylanan nga miresulta sa pagpasikop sa suspetsado.

Si Yamaro sa dihang nahinabi sa mga tigbalita mitug-an nga nianha siya sa balay sa iyang iyaan kay nangaplay siya og trabaho isip construction worker.

Matud ni Yamaro nga niadtong Disyembre 20 sa miaging tuig samtang diha siya sa sulod sa prisohan sa Sibonga kalit lang siya giingnan sa jailguard nga si PO2 Noel Rodriguez nga buhian siya kay Pasko aron makauban niya ang iyang pamilya.

Tungod sa maong pag-eskapo nag-atubang og imbestigasyon si Rodriguez ug na-dismiss sa serbisyo sulod sa upat ka buwan apan miapelar kini sa desisyon ug na-reinstate pagbalik sa serbisyo. (BANATNEWS)