Way 'PS', 'ICC' marks kuyaw

CEBU, Philippines - Gipahimangnoan sa kagamhanan ang publiko batok sa pagpamalit og mga Christmas lights nga walay markang Philippine Standard (PS) ug Import Commodity Clearance (ICC) kay peligro kining makamugna og dakong sunog.

Ang maong pasidaan gihimo ni Zaide Bation, ang hepe sa   Cebu Consumer Welfare and Business Regulatory Division sa Department of Trade and Industry –7.

Mitambag si Bation sa mga konsumidor nga ang kalidad sa produkto maoy basehan sa ilang pagpalit og Christmas lights ug dili ang presyo. 

Karong buwana hangtod na sa Disyembre maoy tingkusog sa pinalitay sa mga Christmas lights gumikan sa nagkaduol na nga adlaw sa Pasko.

Matud pa ni Bation nga kanunay karon sila nag-monitor sa mga tindahan aron mapakgang ang mga negosyanteng abusado nga wala motuman sa balaod sa pagpamaligya og Christmas light.

 “Kung magduda ang mga consumers sa gipalit nila nga Christmas light, puwede man sila modangop sa among buhatan o kaha motawag sa 2557082 aron mahimoan na nato og aksyon,” nagkanayon si Bation.   Ang mga Christmas lights nga walay markang PS ug ICC nagpasabot nga wala kini mosubay sa Philippine Standard Law ug nagpasabot nga kuyaw kining gamiton. (BANATNEWS)