CEBU, Philippines - Aniay bag-ong modus operandi ang mga tulisan nga angayang bantayan sa publiko diha sulod sa mga pasaheroan ug sa ubang lugar. Usa ka babaye ang gipatiran sa usa ka pasahero sulod sa jeep ug gikuhaan sa iyang bulawang singsing sa backup niini.
Ang insidente nahitabo diha sa dalan Jones Avenue pipila lamang ka metros gikan sa gate sa Police Regional Office-7 ning siyudad diin usa ka Leza May Herrero,28, ang nabiktima.
Si Herrero midangop sa Fuente Osmeña Police Station ug miasoy nga nagsakay siya og jeep pasaheroan nga 17D gikan sa Colon padulong sa Lahug dihang nakamatikod kini sa kaatbang nga pasahero nga lain og tinan-awan.
Apan wala lang kini niya panumbalinga apan paglapas nila sa PRO-7 kalit lang kining gipatiran sa maong lalaki diha sa iyang paa. Tungod niini nakurat si Herrero ug nasamot ang iyang kakugang dihang kalit siyang gikuptan sa iyang tupad nga lalaki ug mideklarar og tulis dayong hulbot sa iyang wedding ring. Ang bulawang singsing nagbalor og P9 mil.
Human niini daling nanganaog ang mga tulisan nga wala gani mamatikdi sa drayber sa nahitabo sa pasahero niini.
Sigon pa sa kapulisan sa Fuente Osmeña Station nga bag-ong stratehiya na usab kini sa pagpanulis. Matud pa nga ang mopatid igo rang mokuha sa atensyon sa biktima apan lain ang aktwal nga mokuha sa butang. (BANATNEWS)