CEBU, Philippines - Samaran ang usa ka inahan human kini pusila sa wala hiilhing kriminal didto sa barangay Bae, lungsod sa Sibonga sa miaging gabii.
Ang biktima nailhan nga si Miguela Carreon Semberino, 44, nga taga Bae.
Base sa inisyal nga imbestigasyon sa kapolisan sa lungsod sa Sibonga nasayran nga ang biktima uban sa iyang mga anak nahinanok na unta kini sa pagkatulog dihang kalit lang kining giluthang.
Nasayran nga ang kriminal misuong sa silong sa balay ug didto siya manukad pagpusil sa biktima kansang buko-buko maayong pagkasabak. Ang kapolisan nga nakadawat sa maong alarma dali usab nga mirespondi ug gidali pagdala ang samaron sa usa sa mga tambalanan sa siyudad sa Sugbo.
Sa pakighinabi sa Banat News ni SPO2 Marlon Cortez, mibutyag nga padayon pa nilang gisubay ang maong hitabo aron pagtumbok sa angay kapasanginlang kriminal.
Nasayran nga may 17 kilometros ang gilay-on sa balay sa biktima gikan sa lungsod ug gipaabot sa kapolisan nga may makasumbong kanila bahin sa mipusil sa biktima. (BANATNEWS)