Drug pusher tiklo sa buy bust

CEBU, Philippines - Nagtingkagol na sa prisohan ang usa ka illegal drug pusher kinsa nadakpan sa kapolisan sa lungsod sa Consolacion atol sa buy bust operation nga ilang gipahigayon didto sa barangay Tayud sa maong lungsod sa miaging gabii.

Ang suspek mao si Ciril Gemar Seminse, 43, ulitawo, nga taga Tayud kinsa nasakmitan og tulo ka pakete nga shabu, kahimanan sa paggamit niini, ug P300 nga marked money.

Si SPO4 Alin Garciano sa kapolisan sa maong lungsod nga nahinabi sa Banat News miingon nga ang iyang mga kaubang polis nga gipangulohan ni PO3 Artemio Tumakay sa sayo pa nakadawat og taho kalabot sa illegal nga kalihokan sa maong suspetsado didto sa maong lugar.

Busa ila dayon kining gipanid-an hangtod nga gipatuman gilayon ang buy bust operation pinaagi sa pagpakaaron-ingnon sa pipila nila ka mga kauban nga mopalit og shabu. Unya   usa ka police decoy nga maoy mitunol sa P300 nga salapi ngadto suspetsado nga bayad sa tulo ka paketeng shabu niini.

Matud ni PO3 Garciano nga dungan sa pagtunol sa suspek sa shabu ngadto sa police decoy, gisignit dayon siya sa kapolisan.

Misulay pa unta kini sa paglugnot kay moeskapo apan nagunitan siya sa kapolisan ug giposasan dayon.

Ang maong dinakpan ilang pasakaan og kaso nga pagpayuhot og ilegal nga drugas ubos sa Republic Act 9165 kon Comprehensive Dangerous Drugs Act of 2001. (BANATNEWS)