CEBU, Philippines - Usa ka Amerikano nagtibi nga misumbong sa kapolisan sa lungsod sa Consolacion kagahapon kay wala na siya kaantos sa iyang uyab nga Sugboanon kinsa nangawat na sa iyang mga butang sulod na sa lima ka higayon.
Siya si James William Bigelow, 64, lumad nga taga Washington DC, United States of America kinsa nagpuyo sa Bamboo Hills, sa barangay Casili sa maong lungsod sulod sa siyam na ka tuig .
Si Bigelow kinsa gibuwagan sa asawa niyang Filipina, nagkauyab og si Journalyn Semblante, hingkod nga taga barangay Sacsac, Consolacion kinsa maoy gipasanginlan niyang mikawat sa iyang heirloom ring ug mga kahimanan sa computer nga mibalor og kaping P30 mil sa miaging gabii.
Matud pa ni Bigelow nga didto kini kawata sa suspetsado sulod sa iyang balay kay matag higayong mingawon siya sa suspetsado iya lang kuno kining tawgon sa telepono ug moadto usab dayon kaniya. Matud pa sa biktima nga ika-lima na kining higayon nga gibuhat sa suspetsado kaniya busa wala na siya kaantos ug iya nang gisumbong sa kapolisan.
Midugang siya nga giangkon na kining tanan sa suspetsado, ug naglagot na siya kay bisan kadaghan na niya hatagi og higayon, padayon lang gihapon sa pagpangawat sa iyang butang busa gusto na niyang mahunong kini.
Sa interview sa Banat News kang Bigelow kini nagkanayon. “This is the time that she has done this to me. I gave her lots of chances but she kept doing it so this, I believe, this has to stop”, pamahayag pa ni Bigelow.
Sa pagkakaron padayon pang gipangita sa kapolisan ang suspetsasdo aron atubangon niini ang kaso nga isang-at sa biktima batok kaniya. (BANATNEWS)