CEBU, Philippines - Gikuha nga consultant sa kagamhanan sa dakbayan sa Sugbo si kanhi konsehal Edwin Jagmoc aron motabang sa pagmintenar sa limpyong palibot sa siyudad ilabi na sa hustong pagpanghipos sa mga basura.
Si Konsehal Noel Wenceslao maoy nangamahan sa resolusyon nga gi-aprobahan atol sa sesyon sa konseho sa miaging adlaw nga naghatag og gahum kang Mayor Michael Rama nga makapirma og kontrata pagkuha sa serbisyo sa kanhi konsehal.
Mi-epekto ang kontrata ni Jagmoc sugod niadtong Hulyo 1 hangtod sa Decembre 31, ning tuiga.
Si Jagmoc maoy consultant sa public service office ni Mayor Rama ug magdawat siya og suhol nga P18 mil matag bulan.
Nasayran nga si Jagmoc aduna pa untay nahabiling usa ka termino apan wala na kini magpapili og balik pagka konsehal niadtong milabay’ng eleksiyon sa Mayo 10 hinungdan nga gihulipan kini ni Konsehal Wenceslao. (BANAT NEWS)