Duha ka polis nga natulog sa pwesto suspensuhon - Ontog

CEBU, Philippines - Duha ka polis sa lungsod sa Cordova ang posibleng masuspenso og kinse ka adlaw ug dili makadawat sa ilang bonus human maaktuhing nangatulog sa ilang pwesto sa mismong regional director sa Police Regional Office-7.

Si PRO-7 Chief Supt. Ager Ontog Jr. mipahigayon og surprise inspection niadtong Septiyembre 28 sa gabii ug iyang girombo ang Cordova Police Station.Apan maoy misugat sa panan-aw ni Ontog nga sirado ang pultahan sa police station hinungdan iya kining gituktok apan naka-lock ang pultahan maong tungod sa kalagot ni Ontog nga walay mitubag gipugos niya kini pag-abli ug maoy iyang nakita nga naghagok ang duha ka polis nga sila si SPO1 Laurente Wagwag ug PO2 Manfred Maarat.Sa maong hitabo, daling gitawagan ni Ontog ang hepe sa Cordova nga si Sr. Insp. Felix Pacaldo ug gimandoang mohimo og special report ug iduso ngadto kang Sr. Supt. Erson Digal ang pangulo sa kapulisan sa probinsya.

Si Sr. Insp. Ruben Cuizon, hepe sa Investigation and Detective Management Branch (IDMB) sa provincial headquarters mitug-an sa mga tigbalita nga ang maong penalty pagsuspenso sa suholan sa duha ka pulis pirmahanan nalang ni Digal kinsa atua karun sa Metro Manila nga mitambong sa tulo ka adlaw nga seminar uban sa city ug provincial director gikan sa rehiyon 6 ngadto sa 13.

Ang suspenso sa suhulan magsugod karung Disyembre uno hangtud sa petsa 15 sunod buwan.

Matud ni Cuizon nga ang rason ni Wagwag ug Maarat dili madawat tungod kay sila mga polis.  – BANAT NEWS