Pag-interbener sa mga obispo gihangop

CEBU, Philippines - Gihangop sa mga kawani nga sakop sa Visayan Electric Company Employees Union (VECEU) ang pagtugot sa National Labor Relations Commission (NLRC-7) sa Visayas Clergy Discernment Group (VCDG) nga makapatunga aron motabang paghilot sa kasungian sa pamuo.

Ang Presiding Commissioner sa NLRC Violeta Bantug miluwat og katin-awan niadtong Nobyembre 16 niining tuiga nga nagtugot sa VCDG nga makapahigayon og mediation tali sa mga sakop sa union ug sa VECO management. Matud sa presidente sa VECEU Casimero Mahilum nga dako kaayo nilang pasalamat nga gitugotan ang kahugpongan sa mga Obispo paghilot sa maong problema ug nanghinaut sila nga makab-ot niini ang positibong resulta.

Busa gipahibawo ni Mahilum ang NLRC sa kaandam sa VECEU pagkooperar sa himoong mediation sa VCDG ug gipanghinaut usab nila nga respituhan kini sa VECO management.

Nasayran nga una nang gibalibaran sa Veco management ang sugyot sa VCDG nga motabang pagpahigayon og mediation human itugyan na ngadto sa NLRC ang hurisdiksyon paghusay niini.

Ang mga miyembro sa union una nang miduso og notice of strike sa DOLE-7 apan napugngan ang ilang welga tungod sa saad sa DOLE nga mohilot sa maong kasungi-an. – BANAT NEWS