CEBU, Philippines - Nagtingkagol sa Talisay City detention cell ang usa ka 40-anyos nga babaye human kini giingong midunggab sa iyang kapuyo tungod sa selos niadtong Huwebes sa hapon.
Ang suspetsado mao si Maria Theresa Colminares, hingkod, nga taga Talisay kinsa gipasanginlang midunggab kang Belarmino Villaver, 48, nga iyang kapuyo.
Si Villaver kinsa nakaangkon og samad dinunggaban sa walang bahin sa buko-buko ug tuong abaga daling gidala ngadto sa Talisay City District Hospital apan gibalhin kini ngadto sa Vicente Sotto Memorial Medical Center ug nakagawas na kagahapon, mibahad nga mopasaka og kaso batok sa suspetsado.
Si Villaver nga nahinabi sa Banat News kagahapon mibutyag nga si Colminares nagselos sa iyang igsuon.
Sa wala pa lubaa, si Colminares giingong nag-inom kini og ilimnong makahubog ug dihang nalasbag na giingong kalit lang nga mikuha og kutsilyo ug gidunggab si Villaver samtang nagtalikod nga nagtan-aw og tennis.
Ang balay sa pamilya ni Villaver diin siya ug si Colminares nagpuyo atbang sa tennis court sa Talisay. – BANAT NEWS