CEBU, Philippines - Usa ka private corporation nangayo og pagpasabot sa duha ka opisyal sa Department of Transportation and Communications (DOTC) bahin sa lakang niini sa pagpabalik sa extension sa Land Transportation Office (LTO) ngadto sa Talisay City Hall.
Ang Matvel Holdings Corp. (MHC) miawhag sa korte nga si DOTC Secretary Jose P. de Jesus ug Assistant Secretary Virgnia P. Torres mopasabot sa rason nganong dili sila ma-contempt luyo ning ilang paglapas sa balaod bahin sa kasong nahukman na.
Ang MHC misang-at sa petisyon ngadto sa Regional Trial Court (RTC) Branch 16 sa sala ni Judge Sylvia G. Aguirre-Paderanga human si de Jesus miluwat og memorandum niadtong Oktubre 10, 2010 nga nagmando sa pagpabalik sa LTO ngadto sa city hall gikan sa South Central Square (SCS) sa barangay Lawaan 3.
Laing memorandum ni Torres niadtong Oktubre 20, 2010 nga nagmando kang LTO-7 Director Raul Aguilos sa pagkompleto sa tanang mga rekisitos sa pagbalik sa buhatan sa LTO ngadto sa city hall.
Kini luyo sa wala pa mabahas nga kontratang gipirmahan tali sa LTO ug MHC nga sulod sa 25 ka tuig kinahanglang magpabilin ang LTO nga moukopar sa SCS .
Niadtong Mayo 14, 2007 si Mateo H. Velasco, representante sa MHC ug kanhi hepe sa LTO nga si Alex Leyson mihimo usab og Memorandum of Agreement (MOA) kabahin sa nahisgutang kontrata.
Apan niadtong Septiyembre 8, 2010 ang korte miluwat og order sa pagkonsidera nga ang kaso na-terminated na “for all intents and purposes” based on the filed manifestation of both parties that they have “honestly and faithfully completed with all the terms and conditions of the Agreement”.
“Let this case be removed from the docket of this court”. So ordered, base sa desisyon ni Paderanga.
Busa ang MHC miduso og motion alang sa pagluwat og writ of execution nga nag-awhag sa LTO sa pagtuman sa desisyon sa korte. – BANAT NEWS