Punta Engaño misakmit sa Float category sa Garbo Festival

CEBU, Philippines - Nahimong mabulokon ang Garbo Festival 2010 sa dakbayan sa Lapulapu nga gisalmotan sa 29 ka mga barangay sa miaging adlaw.

Sa float category midaug sa unang ganti ang barangay Punta Engaño nga migamit og shells ug shellcrafts gikan sa ilang shellcraft industry ug mibulsa sa P30,000 nga ganting salapi uban ang plaque niini.

Ang ikaduhang ganti naangkon sa Calawisan nga nagpasundayag sa ilang lato ug sea foods nga produkto nga abunda sa ilang lugar ug nakaangkon sa P25,000 nga ganti samtang ang ikatulong ganti nakuha sa Olango Island nga mipakita sa bird sanctuary, P20,000.

Sunod nga midaog ang barangay Gun-ob nga nagpakita sa ilang float nga puso ug inasal ug ang barangay Suba-Basbas sa ikalimang pwesto nga mipakita diha sa ilang float sa rope making.

Sa pasahalad category, ang barangay Bankal kansang industriya nalambigit sa aviation maoy nakadawat sa unang ganti uban sa P50,000 cash samtang ang barangay Buaya nga nakakuha sa ikaduhang ganti mipakita sa ilang oil reservoir.

Ang barangay Pajo maoy ikatulong ganti sa ilang pasundayag sa Mactan Benito Ebuen Airbase, sunod ang barangay Looc sa Oil Reservior 2, ug ang ikalima mao ang barangay Mactan sa wood craft and furniture.

Si ABC Federation President Leo Mercado kinsa maoy nangulo sa pagpasiugda sa maong indigay miingon nga ang garbo festival maoy kahigayonan sa pagpakita sa mga produkto o dagkong buhatan nga nakahatag kanila og kalamboan.

Si Raleigh Vilo ang event coordinator sa maong kalihukan mibutyag nga mas dako ang premyo ug gahin sa kalihukan karong tuiga nga P768,663 itandi sa milabay’ng tuig nga mokabat lamang sa P500 mil.  – BANAT NEWS