4 ka pusher gipasakaan na'g kaso

CEBU, Philippines - Gipasakaan og kaso nga paghupot ug pagpamaligya og shabu ang upat ka tawo nga nadakpan sa kapolisan sa dakbayan sa Mandaue ug dakbayan sa Lapulapu dili pa dugay.

Sila mao si Randy Igot, 38, ug Rey Malingin, 30, nga pulos taga barangay Mactan sa dakbayan sa Lapulapu, ug Jeff Medallo, 22, ug Gomer Jorak, 30, nga pulos taga barangay Alang-alang sa dakbayan sa Mandaue.

Si PO2 Jude Marifoshi sa Lapulapu City Police Office miingon nga si Igot nasakmitan og walo ka pakete nga shabu ug tulo usab ka pakete ang nasakmit gikan kang Malingin.

Didto nila hidakpi si Igot ug Malingin sa sitio Soong sa barangay nga may dalang mga shabu. Samtang si Inspector Wilson Abot, hepe sa kapolisan sa Presinto 5 sa Opao Police Station sa dakbayan sa Mandaue miingon nga didto nila hidakpi sa barangay Alang-Alang, dakbayan sa Mandaue sila si Medallo ug Jorak ug ila usab kining nasakmitan og lima ka pakete nga shabu, mga kahimanan sa paggamit niini nga naglakip sa tin foil ug ingon man ang minarkahang salapi nga P200 isip mga ebidensiya.

Sa pagkakaron ang upat gipasakaan na og kaso gumikan sa paglapas sa Republic Act 9165 kon Comprehensive Dangerous Drugs Act of 2001. – BANAT NEWS