PUJ midasmag sa 2 sakyanan 16 angol

CEBU, Philippines - Napiit ang drayber sa pasaheroan ug naangol ang dul-an sa 20 ka pasahero ug nangalandig sa tambalanan human sa panagbangga niini sa usa ka taxi kagahapon sa alas-4 pasado sa kaadlawon diha sa dalan M.J. Cuenco Avenue sa barangay Tinago ning dakbayan.

Ang mga biktima igo lang nakaangkon og garas sa kalawasan ug samad sa ulo atol sa aksidente nga anaa karun sa publiko ug pribadong tambalanan dinhi sa dakbayan.

Nalandig sa Chung Hua Hospital mao sila si Elizabeth Felocino, 19; taga Basak ning dakbayan, Tiffany Senilo, 20; taga Consolacion, Mirasol Saldua, 33; taga South Poblacion San Fernando, Jane Purosuello, 25; taga Liloan.

Samtang ang nadangat sa Cebu City Medical Center mao sila si Junrey Sarnia, 28; taga Consolacion, Romar Villegas, 22; taga Mandaue, Jobines Navarro, taga Carcar, Bebot Miala, taga San Fernando, Dodong Ruiz, taga San Fernando, Eddie Llena, taga San Fernando, Joel Pino taga Mahayahay Medellin, drayber sa PUJ nga 21D ug ang babaye nga tapad ni Pino nga wala pa makuha ang pangalan sa traffic division.

Samtang sa Vicente Sotto Memorial Medical Center gidala sila si Geomedes Navares, 41; taga Carcar, Marieta Gabiola, 46; taga Bakilid Mandaue, ug ang magtiayong Diaz nga sila si Elsa ug Edwin nga taga Maribago Lapulapu.

Subay sa pasiunang imbestigasyon ang PUJ nga 21B nga gimaneho ni Mark Anthony Montana, 20, unang mibangga sa Juscar Taxi nga gimaneho ni Macvit Javido ug pagkahuman gibanggaan na usab niini ang gikasugat nga laing PUJ nga 21D nga gimaneho usab ni Pino.

Si Montana gikan sa dalan Colon ug paingon sa Mandaue nga dunay sakay nga 20 ka pasahero subay sa M.J. Cuenco nga dili maoy iyang rota nga iyang giagian. Pag-abot sa may Cebu Technological University (CTU) dayon na sa may eskina V. Sotto giingong kusog nga nagpadagan si Montana dihang iyang nadasmagan ang taxi ni Javido kinsa niadtong tungora paingon mo-left turn.

Si Javido nga na-interbyu sa DyHP miingon nga kusog kaayong nagpadagan si Montana hinungdan iyang gilubag og maayo ang manobela paglikay niini apan naabtan gyud ang tuong bahin sa iyang taxi.

Si Montana nga nawad-an na og kontrol sa manobela niadtong higayuna misimang na sa pikas linya ug naigo ang PUJ nga gimaneho ni Pino.

Tungod niini napiit sa manobela si Pino ug ang iyang tupad nga pasaherong wala mailhing babaye. Hinuon luwas ang mga pasahero ni Pino apan ang tanang pasahero ni Montana pulos nalandig sa tambalanan.

Si Montana sa samang interbyu mihimakak nga kusog iyang pagpadagan ug midugang nga iyang gibusinahan si Javido apan miaksyon kinig abante maong iyang gilikayan aron dili unta maigo.

Si PO3 Armando Bañoc sa Traffic Division nga maoy nag-imbestigar sa aksidente nagkanayon nga bisan pa sa pangangkon ni Montana aduna siya’y nakitang timailhang kusog gyud ang pagpadagan niini.

Sila si kanhi Tinago barangay kapitan Joel Garganera ug mga kauban maoy unang miresponde sa nahitaboan ug mitabang sa mga biktima.

Nagtuo si Bañoc posibleng nag-apas sa oras si Montana nga makabalik dayon sa kinapusoran sa dakbayan kay nianang orasa daghan pang mga pasahero paingon sa Mandaue.

Si Montana kasamtangan unang gitanggong sa karsel sa City Traffic Operation Management (Citom) sanglit gipaabot pa ang mga nangaangol kung si kinsa ang mopasaka og kaso batok kaniya.

Kagahapon sa buntag nagtigom ang mga sakop sa Citom Board nga gipangulohan ni kanhi konsehal Sylvan Jack Jakosalem ug gituki ang maong hitabo.

Si Jakosalem nipahibawo sa mga sakop sa media nga human sa ilang tigom manakop sila og mga drayber sa 21B aron subling pagdili na nga makasulod dinhi sa kinapusoran sa dakbayan. – BANAT NEWS