CEBU, Philippines - Nagkahiusa ang mga nagkalain-laing sektor sa mga institusyon sa Sugbo partikular na ang Cebu Contractors Association (CCA), North Reclamation Area Land Owners Association (NRALOA) ug ang kagamhanan sa siyudad sa Sugbo aron ipaayo ang mga gubaong dalan sa North Reclamation Area (NRA).
Ang maong programa gitawag og Private-Public-Partnership (PPP) nga diin ang mga pribadong establisamento hatagan og katungod nga mopaayo sa kadalanan partikular na sa J.L. Briones, 3rd Avenue ug ang J. Devera Street.
Ang maong mga dalan maoy labing guba nga dalan sa maong lugar ug lunopan panahon sa ting-ulan ug dili maayong agian sa mga sakyanan gumikan sa lapok.
Pipila usab sa mga negosyo sa maong dapit ang naapektohan gumikan sa kalibaong sa maong dalan.
Ang Cebu Contractors Association, nga gipangulohan ni Engr. Peter Paul P. Dy Jr. mipasalig nga sila ang moabaga sa mga gikinahanglan nga mga materyales ug mga ekipo nga gamiton sa pag-ayo sa nahisgutang mga dalan.
Ug sa samang paagi ang Cebu City Government, gipangulohan ni Mayor Michael Rama mohatag og awtorisasyon alang sa pag-ugmad sa maong dalan sulod sa 60 ka adlaw.
Samtang ang NRALOA mipasalig nga sila ang moabaga sa mga gastuhan sa gasolina nga gamiton sa CCA partikular na ang mga ekipo ug mga dagkong sakyanan nga himuong kargahan sa mga balas ug graba.
Gibana-banang moabot ngadto sa 12,800 litros sulod sa tulo ka adlaw nga trabaho ug gibana-bana nga nagkantidad kini og P435,000.
Samtang ang kagamhanan sa siyudad pinaagi sa Squatters Prevention Encroachment Elimination Division (SPEED) maoy mopapahawa sa mga ilegal nga mga edipisyo nga maagian sa maong proyekto. – BANAT NEWS