Kapitan sa Poblacion, Talisay gikiha

CEBU, Philippines - Tulo ka mga residente sa barangay Poblacion, dakbayan sa Talisay mipa-blotter batok sa kapitan sa nahisgutang barangay nga si Teodoro “Balo” Belleza gumikan sa pagpatukod niini og building nga giingong walay mga papeles.

Ang mga mireklamo mao ang magtiayong Enrique, 75-anyos ug Patricia Fernandez, 61 ug ang silingan nilang si Maria Bulagao, 51, pulos nagpuyo sa maong lugar.

Base sa natala sa blotter sa Talisay City Police Station nga si Enrique ug Bulagao mikomprontase kang Belleza tungod sa pagpatukod niini og building diha sa atubangan sa koral sa ilang gipuy-an.

Ang duha nagkanayon nga ang patukoran og building sa kapitan lote sa kagamhanan sa Talisay ug gikwestiyon nila kung aduna bay building permit ang kapitan sa pagpatukod sa edipisyo tungod kay sila kaniadto gipangayoan sa barangay og permit gikan sa city engineering dihang nagkural sila sa ilang lote.

Ang nahisgutang mga biktima mipasangil kang Belleza nga misulti og “way magbuot nako kay akoy kapitan, wa na kinahanglana ang permit kay akoy kapitan”. – BANAT NEWS