PDEA miangkong di kabantay sa mga shipment sa illegal nga drugas

CEBU, Philippines - Miangkon si Regional Director Adrian Alveriño sa Philippine Drug Enforcement Agency (PDEA) sa Region 7 nga aduna silay pagkuwang sa seguridad sa shipment nga moabot dinhi sa rehiyon nga naglakip na sa ilegal nga drugas.

Matud ni Alveriño, aduna ray duha ka canine units ang iyang ahensya nga maoy ilang gamiton sa pagsiksik sa mga ilegal nga drugas. Sumala pa sa report, adunay gibanabanang pito ka milyones nga mga drug addicts dinhi sa nasud ug 3 mil niini nia sa rehiyon ug usa ka libo niini nia sa dakbayan sa Sugbu.

Lakip sa maong kalihukan mao ang mga drug pushers, financers, protectors nga maoy may dakong miyembro.

Matud usab ni Alveriño lisud sulbaron ang maong kalihukan tungod nga mismo ang mga kabataan nga miapil na sa pagpamaligya og drugas.

Ang shabu maoy nag-una karong halinon nga ilegal nga drugas sunod ang marijuana nga maoy barato ug makaya sa bulsa sa mga batang drug addict. Giingong lakip sa nigamit niini mga tinun-an sa elementarya.

Giangkon ni Alveriño nga mismo ang mga politiko maoy nangunay sa pagpaluyo niining mga druglords.

Si Atty. Arnold Valle sa Regional Internal Affairs miawhag sa PDEA ug sa National Bureau of Investigation (NBI), Philippine National Police (PNP) ug Bureau of Customs nga hingusgan pa ang kampanya batok sa ilegal nga drugas.

Matud ni Valle mas daghan ang nasikop karon ikumpara sa mga miaging tuig. Giawhag pud ni Valle nga ang publiko makig-alayon sa kampanya batok niini.

Ang selebrasyon sa Drug Prevention Week may tema kini nga “Think Health, Not Drugs”, nga gilusad sa PDEA nga giapilan sa mga institusyon sama sa Abellana National High School, Cebu City National Science High School, University of San Carlos- North Campus, Sacred Heart School ug ang University of Philippines.

Tumong sa PDEA mao ang pag-agni sa mga tinun-an paghingusog sa Campus Drug Watch.   – BANAT NEWS