CEBU, Philippines - Wala mahulga ang mga environmental lawyer sa gisang-at nga P2 milyones nga kasong damages sa Kepco-SPC Power Corp. (KSPC) batok kanila.
Kini tungod sa ilang pagbabag sa nabatasan na sa mga planta sa kuryente nga gisugnoran og karbon sa paglabay sa abo niini didto sa barangay Tinaan, lungsod sa Naga.
Gitug-an ni Cabrido sa interview sa DyRF nga dugay na silang nakapangandam sa maong legal nga lakang sa KSPC tungod kay matud pa nakaapeki kini sa ilang operasyon.
Si Cabrido miingon nga ilang tubagon ang gihangyo sa mga opisyales sa KSPC ngadto sa sala ni Judge Marilyn Lagura Yap sa Regional Trial Court (RTC) sa dakbayan sa Mandaue nga pabayron sila og P2 million damages lakip na ang petition for the issuance of an environment protection order (EPO).
Si Cabrido mitumbok nga ang pagsumbalik ug pagpangayo og danyos sa KSPC, usa lamang sa pagpanghadlok kanila aron isibog ang ilang gipangayong EPO sa maong planta ngadto sa korte.
Kini tungod kay nagtuo siya nga lig-on ang ilang basehanan nga makadaut gyud sa kalikopan ug panglawas sa katawhan ang pagpasagad og labay sa coal ash gikan sa power plant sa KSPC sa dakbayan sa Naga ug ang sa Cebu Energy Development Corp. (CEDC) sa siyudad sa Toledo. – BANAT NEWS