2 ka pusher nasikop sa buy bust

CEBU, Philippines - Duha ka mga gidudahang pusher sa illegal nga drugas nga naglihok sa Brgy. Alang-alang dakbayan sa Mandaue nasikop sa kapolisan kagahapon sa kaadlawon.

 Ang nasikop mao sila si Jeff Medallo, 22, ug Gomer Giora, 32, pulos ulitawo, nga taga barangay Basak, dakbayan sa Mandaue.

 Ang nakasikop sa maong mga suspetsado mao sila si P/Insp. Wilson Abot ug mga sakop niini sa gipahigayon nilang buy bust operation sa maong dapit.

 Matud pa ni P/Insp. Abot, kinsa maoy hepe sa Police Station 5 nga si Medallo maoy tigdala sa illegal nga drugas sa maong dapit ug si Giora maoy tig-apod-apod niini ngadto sa mga drug pusher sa dakbayan.

 Nasayran nga kadaghan na kini suwayi og dakop sa kapolisan apan matud pa idlas ug dangog kaayo ang duha .

Apan kagahapon sa   alas 4:15 sa kaadlawon wala na makaipsot gikan sa mga kamot sa kapolisan ang duha nga misangpot sa pagkagulkol nila karon sa prisohan.

 Nasakmit usab sa kapolisan gikan kang Medallo ang upat ka gagmayng pakete sa shabu samtang si Giora nakuhaan usab og usa ka pakete sa shabu ug mga kagamitan sa pagsuyop niini, lakip na ang P200 nga buy bust money.

 Ang duha ka suspetsado mag-atubang og kasong kalapasan sa Akta Republika 9165 ubos sa Sec. 5, 11 ug 12 sa Art. II samtang anaa kini natanggong sa Station 5 sa MCPO.  – BANAT NEWS