Imported meat gireklamo

CEBU, Philippines - Mitiyabaw na ang lokal nga tig-suplay og karneng baboy sa Central Visayas gumikan sa pagsulod sa merkado sa imported nga karneng baboy nga gipamaligya sa mas baratong presyo sa kamerkaduhan ug peligro usab sa panglawas sa konsumidor.

Base sa survey sa merkado ang imported nga karne gibaligya lang sa presyo nga 85 ka pesos hangtod 120 ka pesos matag kilo nga dili maapas sa lokal nga namuhi og mga baboy gumikan sa kamahal sa lawog niini karon. Ang mga sakop sa Central Visayas Pork Producers Cooperative (CeViPPCO) nahadlok nga ang pagdaghan sa suplay sa imported nga karne makaapekto 65,000 nga pamilya nga namuhi og baboy sa Central Visayas.

Ang presidente sa CeViPPCo, Ronaldo Tambago, miingon nga ang maong imported nga karne dili usab siguradong luwas aron ikunsumo tungod kay walay klarong storage facility sa mga merkado.

Matud pa ni Tambago frozen product ang mga imported nga karne ug kinahanglang adunay dagkong freezers nga kabutangan niini, butang nga wala sa kamerkaduhan karon.

Si Eric Dabon sa CeViPPCo miangkon nga mismo siya nakakita og expired na nga imported nga karne sa merkado sa Mandaue.

Si kagawad Maria Pino, chairman sa Cebu City United Vendors Association (CCUVA) miangkong walay freezers ang Carbon market maong ibaligya nila og barato ang imported nga karne. Ang CeViPPCo gikatakdang motambong sa Congressional hearing karong Lunes mahitungod sa ilang problema.  – BANAT NEWS