CEBU, Philippines - Nabulit sa mga samad ang lawas sa usa ka ulitawo lalaki human kini dunggaba sa giingong grupo sa nasuya kaniya didto sa Mulle Osmeña Wharf sa barangay Poblacion, dakbayan sa Lapulapu sa miaging gabii.
Ang biktima mao si Emmanuel Bellejo, 21, ulitawo, nga taga barangay Punta Ingano sa maong dakbayan samtang usa sa lima ka tawong nagtinabangay pagluba sa biktima nailhan lang sa ngalang Marlon kansang bansagon wala makuha sa kapolisan.
Si SPO2 Rolito Jumao-as ug PO1 Jonard Cinco sa homicide section sa kapolisan sa maong dakbayan miingon nga kuyog sa biktima ang hinigugma niining babaye ug nagkukabildo sa usa ka tindahan sa maong lugar.
Sa pagpanglakaw sa biktima ug sa hinigugma niini, kalit lang mitumaw si Marlon uban sa upat ka wala hiilhing mga kauban ug gidasmagan dayon ang biktima ug gikulata hangtod nga gitusaktusak sa kutsilyo ang lawas.
Dihang natumba ang biktima sa yuta gibiyaan kini sa grupo kinsa daling mipahilayo gikan sa maong lugar.
Gihatod dayon sa mga nakasaksi ang biktima ngadto sa Vicente Sotto Memorial Medical Center sa dakbayan sa Sugbo.
Si SPO2 Jumao-as miingon nga ilang gituohan nga ang biktima malagmit gisuyaan lang sa maong mga batan-on kinsa maoy rumbo karon sa pagpangita nga gihimo sa kapolisan. (BANATNEWS)