Nanion og armas nadakpan

CEBU, Philippines - Nadakpan sa kapolisan ang usa ka tawo nga nanion og armas sa iyang silingan didto sa Sector 6, barangay Pagsabungan, dakbayan sa Mandaue, sa miaging gabii.

Ang nadakpan mao si Felix Flores, 55 , minyo nga nagpuyo sa maong dapit ug ang biktima nga gitionan og armas mao si Solintino Alagaro, hingkod ug silingan niini.

Si SPO1 Juan Calamba sa Presinto 3 sa Basak Police Station sa maong dakbayan nga nahinabi sa Banat News miingon nga samtang naglakaw ang biktima sa karsada nakit-an kini sa suspetsado ug gibaharan nga patyon.

Midugang si SPO1 Calamba nga human pasidan-I ang biktima, milakaw dayon ang suspetsado ug pagbalik niini nagmaneho kini og motorsiklo ug gisuwayan og dasmag ang biktima sa gibarogan niini daplin sa karsada ug maayo nalang kay nakalihay ang naulahi.

Unya pagkanaog sa suspetsado gitionan dayon niini ang biktima sa iyang dalang armas de fuego ug aron masalbar gikan sa kamatayon, gilayog sa biktima ang suspetsado ug didto nag-inilogay sila sa armas de fuego.

Apan matud pa ni SPO1 Calamba nga natukma usab nga nahiagi ang nagpatrolya nga kapolisan sa maong lugar ug napakgang ang maong pag-inilogay sa armas kay dihadiha nasikop man ang suspetsado.

Nasakmit gikan sa maong dinakpan ang kalibre 45 uban sa usa ka magazine nga gisudlan og pito ka mga buhing bala ug kasong pagpanghulga ug kalapasan sa Republic Act 8204 kon illegal nga paghupot og armas nga makamatay ang ilang giandam batok sa maong dinakpan. (BANATNEWS)