Suspetsadong tulisan kritikal

CEBU, Philippines - Usa ka suspetsado sa pagpanulis nga nasikop sa kapolisan sa Talisay nagpabilin pang kritikal ang kahimtang karon sa Intensive Care Unit (ICU) sa Vicente Sotto Memorial Medical Center (VSMMC).

Siya si Johnly Abangan nga napusilan ni PO1 Jessieben Gumandal human siya ug ang iyang kaubang tulisan nga si Jeffrey Paran mitulis kang Myla Mantalaba Bariquiet niadtong Miyerkules sa gabii didto sa sitio Mananga, barangay Tabunok, dakbayan sa Talisay.

Si Inspector Hugo Rio Ipong sa pakighinabi sa Banat News kagahapon mibutyag nga si Abangan wala pa makagawas gikan sa ICU sa VSMMC.

Gawas kang Bariquiet may lain pang duha ka biktima sa maong mga tulisan nga mitungha niadtong Sabado sa gabii sa Talisay City Police Station .

Sila mao si Manryn Bantayo Manlangit ug Mae Ann Rose Nacua Aparis, 16-anyos ug mga residente sa 7-R Duterte Street, barangay Banawa, dakbayan sa Sugbo.

Ang duha mitumbok kang Abangan ug Paran nga maoy mitulis kanila.

Nahibalik ngadto sa maong mga biktima ang uban nilang personal nga butang nga na-recover sa mga polis gikan sa mga suspetsado.

Si Ipong nagkanayon nga mikabat na sa napulo ka tawo ang mitungha sa police station ug mitumbok gyud kang Abangan ug Paran nga maoy mitulis kanila.

Matud usab ni Ipong nga giawhag nila ang mga nabiktima nga mopasaka gyud og kaso batok sa mga suspetsado.

Si Paran ug Abangan mao usay suspetsado sa pagpanulis sa Petron Gasoline Station sa barangay Lawaan I ug sa Nemeño Reach.Com Internet Café and Training Center sa barangay Tabunok. (BANATNEWS)