Milugos sa 6 anyos nga anak sikop

CEBU, Philippines - Gidakop niadtong Domingo sa gabii ang usa ka 53-anyos nga amahan human kini pasanginling milugos sa iyang 9-anyos nga anak nga niadtong panahona 6-anyos pa lamang kini diha sa usa sa mga barangay sa lungsod sa Consolacion.

Ang suspek gidakop nila ni PO3 Allen Garciano ug PO2 Richie Gapo human masuta sa kapolisan nga anaa diha magbahas-bahas ang suspek kinsa aduna nay warrant of arrest tungod sa maong kaso.

Ang suspek dihang nahinabi sa Banat News, mihimakak sa maong akusasyon tungod kay dili mabuhat sa usa ka amahan ang paglugos sa kaugalingong anak.

Dugang pa niya nga pasangil lamang kining tanan ug nagtuo siyang gimugna-mugna lang kini sa maguwang sa bata nga giingong iyang gikasab-an tungod sa wala niya pagtuman sa gisugo niini nga ipapawong ang TV.

Human sa tulo ka tuig nga pagtago-tago nadakpan ang suspek ug kasamtangang nabalhog sa Consolacion Municipal Jail. (BANATNEWS)