Lider sa VECEU mohangyo sa DOLE

CEBU, Philippines - Mopasaka karong adlawa og motion for reconsideration ang presidente sa Visayan Electric Company Employees Union (VECEU) nga si Casimero Mahilum ngadto sa buhatan sa Department of Labor and Employment .

Mohangyo si Mahilum nga himuong physical reinstatement ang ihatag nga kamandoan sa DOLE ngadto sa VECO kalabot sa iyang estado karon sa maong kompanya.

Kahinumduman nga gimandoan sa kalihim sa DOLE nga si Rosalinda Dimapilis Baldoz ang Veco nga ipabalik sa payroll si Mahilum sa miaging semana. Kini nagpasabot nga magdawatan siya og sweldo bisan wala magtrabaho. Kini samtang nagpadayon ang hearing sa reklamo sa mga miyembro sa union diha sa National Labor Relations Commission.

“Sa pagkakaron man gud, dili ko pasudlon sa kompanya kay lage kay ubos rako karon sa payroll reinstatement. Sa kana man gud nga sitwasyon dili ko makabalo sa mga kalihukan sa sulod sa kampanya. Gusto man gud sa akong sakop nga ipabalik gyud ko nila maong mohangyo gyud mi ni Secretary Baldoz nga full reinstatement unta ang iyang ihatag kanako,” matud pa ni Mahilum.

Samtang subling gipadayag ni Mahilum nga andam gihapon siya motambong sa bisan unsa nga negosasyon sa Veco basta mohatag lang gyud kaniya ang kompanya og physical reinstatement.

Kahinumduman nga gitangtang si Mahilum sa Veco human kini moreklamo kabahin sa mga paglapas sa maong kompanya sa ilang Collective Bargaining Agreement. (BANATNEWS)