Mga pabuto ibutang sa reclamation

CEBU, Philippines - Gipaabot sa mga manindahay og pabuto sa dakbayan sa Mandaue nga ibutang sila sa kagamhanan sa usa ka lugar nga luwas sa kakuyaw gikan sa sunog.

Nunot usab kini sa nagkaduol nga Pasko ug bag-ong Tuig nga diin ang mga pabuto maoy labing kusog nga palitunon sa mga katawhan.

Si Mandaue City Fire Marshall Rogelio Bongabong miingon nga estrikto nilang ipatuman ang mga lagda bahin sa pagpamaligya og mga pabuto sa dakbayan aron masiguro ang kinabuhi sa katawhan.

Sa pamahayag ni Mayor Jonas Cortes sa mga tigbalita iyang gipadayag nga usa sa mga dapit nga ilang gitan-aw nga maoy mahimong firecracker zone mao ang bakanteng luna sa reclamation area.

Matud pa ni Cortes nga sa maong dapit kinahanglang matag stall adunay fire extinguisher, baril nga may tubig, ug uban pang kahimanan sa pagsanta kun may sunog nga moulbo.

Unya did-an usab ang mga manindahay og pabuto ug bisan si kinsang tawo sa pagtesting sa mga pabuto nga   duol sa mga tindahan sa pabuto.

Gawas niini gidili ang kayo sa palibot sa maong lugar bisan ang pagdagkot og sigarilyo, ug gidili usab nga may gagmay nga mga bata nga matulog sa mga stall sa pabuto.

Si Cortes miingon nga dili na siya buot nga masubli pa ang nahitabong pagkasunog sa mga stall sa pabuto nga mokalas og mga kinabuhi.

Kahinumdoman nga sa bisperas sa pagsaulog sa pasko sa miaging tuig nasunog ang 52 ka mga stall sa pabuto sa maong dakbayan diin tulo ka mga bata ang nakalas. (BANATNEWS)