Sibilyang mag-uniporme'g polis dakpon gyud

CEBU, Philippines - Hugtanong giawhag sa hunta probinsyal ang mga lokal nga kagamhanan ug kapolisan sa kalungsoran ug dakbayan sa probinsiya sa Sugbo nga tinud-on og dakop kadtong mga tawo nga magsul-ob ug mamaligya sa mga uniporme sa kapolisan og militar ngadto sa mga sibilyan.

Mao kini unod sa gipanday nga resolusyon ni bokal Sun Shimura nga gitakdang iyang ipalabang atol sa regular nga sesyon sa hunta probinsyal karong adlawa.

Gipasabot ni bokal Shimura nga naaghat siya og mugna ning maong resolusyon gumikan kay daghan gihapon karon ang mga tindahan nga mamaligya og mga susama sa uniporme sa mga polis ug military ngadto sa mga sibilyan nga yano ra usab kaayong isul-ob sa mga publikong lugar panahon sa pagsuroy-suroy.

Tumong ug tuyo ni bokal Shimura nga mahunong na ang pag-abuso sa mga sibilyan sa paggamit niini human usab mahitabo ang daghan nang pagpanulis diin nalutsan sa mga dautang elemento ang kapolisan gumikan kay nagsul-ob og mga uniporme nga sama sa kapolisan ug kasundalohan.

Sentro sa giawhag ni bokal Shimura diha sa gipanday niining resolusyon mao ang mga hingtungdang lokal nga kagamhanan ug ang Department of Interior and Local Government (DILG) nga moseryuso sa pagpatuman niini aron malikayan na ang pagpahimulos sa mga dautang elemento sa paggamit og mga uniporme sa military ug kapolisan.  (BANATNEWS)