Pacquiao-Margarito fight wala ma-'zero crime'

CEBU, Philippines - Wala matuman ang ‘zero-crime’ nga mao nay nasinati kaniadto pa sa mga nangaging away sa gibansagang Pambansang Kamao nga si Manny Pacman Pacquiao kagahapon human usa ka pagpanulis ang miangol sa usa ka batang nagbantay og tindahan sa sitio Upper Yati, barangay Quiot Pardo, dakbayan sa Sugbo.

Ang pagpanulis nahitabo tunga-tunga sa sangka ni Pacquiao ug ni Antonio Margarito didto sa Dallas, Texas sa Estados Unidos diin ang biktima giila nga usa ka 17-anyos (pangalan gipugngan sa Banat News), taga dalan Sabellano sa nahisgutang barangay.

Ang biktima giingong naguba ang nawong ug daling gidala ngadto sa Miller Hospital human gipuspusan og tangke sa liquefied petroleum gas (LPG) sa duha ka mga tulisang mitulis sa ilang tindahan.

Usa sa mga tulisan giila sa kapolisan nga mao si Butsoy Pisas, nga taga sitio Upper Yati sa maong barangay kinsa padayon pang gipangita sa mga polis.

Si PO3 Fortunato Macaranas mibutyag sa Banat News kagahapon nga giatol sa mga tulisan nga mingaw ang palibot tungod kay ang mga tawo kagahapon mitan-aw sa Pacquiao-Margarito fight.

Matud ni Macaranas nga ang biktima nag-inusara lang nagbantay sa ilang tindahan tungod kay ang inahan niini milakaw.

Ang biktima giingong giguyod sa mga tulisan ngadto sa likod nga bahin sa ilang tindahan ug gituohang misukol hinungdan nga gidakdakan ang nawong niini og tangke sa LPG.

Wala pa masuta kung unsay mga nadala sa tulisan kinsa daling nangikyas tungod kay dili pa makaestorya ang biktima.

Si Sr. Supt. Melvin Ramon Buenafe, direktor sa Cebu City Police Office nagkanayon nga lokal nga mga badlungon ang mga responsable.

Apan sa kinatibuk-an gihulagway ni Buenafe nga hapsay ra ang dakbayan kagahapon ug mipadayag nga angayang magmaya ang mga Filipino sa lain na usab nga dungog nga gihatag ni Pacquiao. (BANATNEWS)