Unos mipalid sa mga atop.

CEBU, Philippines - Nakurat ang mga tawo   dinhi sa dakbayan sa kalit nga paghapak sa kusog nga hangin ug pagtutaligsik kagahapon sa hapon.

Sa barangay Tejero pipila ka mga sin sa atop ang napalid sa hangin ug dunay mga bahin sa mga karaang edipisyo daplin sa dalan sa MJ Cuenco Avenue ang nangatagak sa dalan, hinuon walay nasakitan sa maong insidente.

Pipila usab sa mga sanga sa kahoy ang nangabali ug nangatagak sa dalan samtang diha sa dalan P. Del Rosario sa may Lorega-San Miguel nasinati ang baga kaayong abog lakip na sa MJ Cuenco.

Ang kusog nga hangin nag-uban sa itom kaayong dag-om diha sa langit bisan paman dili palang dugay init kaayo ang panahon.

Si kagawad Gary Lao sa barangay Tejero nga nahinabi sa Banat News kagahapon nagkanayon nga wala hinuon silay nadawat nga report nga dunay nadisgrasya diha sa iyang barangay atol sa paghapos sa hangin.

Samtang sa barangay Poblacion, dakbayan sa Talisay usa sa mga barangay sa siyudad nga daplin sa dagat, si SPO1 Oliver Dacua, duty desk officer sa Talisay City Police Station mibutyag nga midagko ang bawod sa dagat ug nangabali ang mga sanga sa kahoy.

Matud ni Dacua nga mikabat ngadto sa 20 minutos una mihunong ang kusog nga hangin ug uwan, hinuon matud niya nga wala sila makadawat og report nga dunay mga nadisgrasya sa mga residente.

Si Luciano Villamor sa Philippine Atmospheric, Geophysical and Astronomical Services Administration (Pagasa) sa Mactan sa pakighinabi niini sa Banat News mipasabot nga ang nasinating pag-unos kagahapon bunga lamang sa “cold front” ug Inter Tropical Converging Zone (ITCZ).

Gitataw usab ni Villamor nga wala pa silay nasigpatan diha sa ilang kahimanan nga dunay bagyong moabot. (BANATNEWS)