Kanhi sakristan sa Guadalupe namusil

CEBU, Philippines - Nalandig sa tambalanan ang usa ka lalaki human kini pusila sa iyang silingang kanhi sakristan didto sa sitio Bonico, sa barangay Guadalupe ning dakbayan sa Sugbo sa miaging gabii.

Ang biktima mao si Helario “Larry” Arquilos, minyo apan buwag sa asawa, samtang ang suspetsado mao usab si Eleazar Gabotan, 34, usa ka kanhi sacristan sa Sto. Rosario Parish Church ug silingan sa biktima.

Gibutyag sa kapolisan nga niadtong sacristan pa ang suspetsado sa panahon sa iyang pagkabatan-on, buotan kaayo apan dihang nahamtong na kini ug gibuwagan sa asawa, puwerte na kunong pagkabugoya, ug gani pirme lang makasugat og kagubot sa ilang lugar.

Sa miaging gabii nagbarog-barog lang ang biktima sa daplin sa karsada   dihang gipusil kini sa suspetsado.

Samdan sa nagkalainlaing bahin sa lawas, ang biktima daling gihatod ngadto sa Cebu City Medical Center, samtang nasikop usab dayon ang suspetsado ug mikagulkol na karon sa prisohan. (BANAT NEWS)