Bonus sa taga Talisay giandam na

CEBU, Philippines - Ang kagamhanan sa dakbayan sa Talisay nangita na og budget alang sa bonus sa mga kawani niini.

Si Talisay City Administrator Richel Bacaltos nagkanayon nga ang bonus sa mga kawani sa city hall magdepende sa sobra sa ilang budget karong tuiga.

Gibutyag ni Bacaltos nga ang city budget office mao karon ang nangaykay niini aron may ikahatag sila nga bunos sa tanang kawani karong Decembre.

Sa milabay’ng tuig ang mga job order nakadawat og P5,000 nga cash bonus ug tagsa ka sakong bugas matag usa, samtang ang mga regular nga kawani tag P10,000-P15,000 matag usa.

Apan matud ni Bacaltos nga karong Decembre pulos na cash bonus ang tanan nilang ihatag ngadto sa mga kawani.

Gibutyag usab niya nga niining tuiga sa Talisay City hall adunay kapin 900 ka mga job order ug kapin sa 300 ang mga regular nga kawani.

Gawas sa mga kawani sa city hall ang siyudad manghatag usab og mga bundles of joy ngadto sa mga street children ug gani nagpadayon usab ang ilang programa nga “Adopt a Child”.

Gipasabot ni Bacaltos nga mopili sila og usa ka bata nga labing kabus ug ipasagop nila kini usa ka adlaw ngadto sa mga kawani sa city hall nga maayong pagkabutang sa pamuyo aron usab ang nahisgutang bata makatilaw usab og kahamugaway bisan usa lang ka adlaw isip pinaskohan niya. (BANAT NEWS)