CEBU, Philippines - Gihimakak ni Bise Mayor Alan Bucao sa dakbayan sa Talisay ang report nga ang iyang asawa kinsa napiling kapitan sa barangay San Isidro ug ang iyang anak kinsa napiling chairman sa Sangguniang Kabataan sa milabay’ng eleksiyon sa barangay ug SK modagan isip presidente sa Association of Barangay Captain ug SK Chairman sa siyudad.
Base sa nahisgutang report nga si Marieta Bucao, asawa sa bise mayor ug ang asawa ni Konsehal Val Ylanan nga si Ofelia Ylanan maoy mag-atbang sa pagdagan isip presidente sa ABC.
Gawas sa mga asawa sa nahisgutang mga opisyal ang mga anak nila ang giingong mag-atbang usab sa pagdagan isip chairman sa SK sa dakbayan sa Talisay. Ang anak ni Bucao nga si Gabrielle Marc Alan Bucao maoy napiling SK chairman sa San Isidro samtang si Val Joseph Ylanan maoy napili usab nga SK chairman sa barangay Linao.
Ang bise mayor nga nahinabi sa Banat News nagkanayon nga dili interesado ang iyang asawa ug anak nga modagan sa taas nga posisyon.
Midugang siya nga ang pagkandidato sa iyang asawa ug anak sa milabay’ng eleksiyon sa barangay ug SK nagtinguha lamang sa kausaban sa barangay San Isidro pinaagi sa mga proyekto nga ibubo diha alang sa kaayohan sa mga molupyo.
Sa sayo pa si Konsehal Ylanan mihimakak nga ang iyang asawa ug anak adunay plano nga modagan sa taas nga posisyon.
Base sa talaan , may unom ka kapitan lang ang kaalyado sa oposisyon nga mao sila si Buenaventura Pelonio sa barangay Lawaan II, Teodoro Belleza sa barangay Poblacion, Ylanan sa Linao, Marlowe Dagohoy sa Biasong, Ronald Lastimosa sa barangay Lawaan I ug Dario Villaver sa Mohon. (BANAT NEWS)