CEBU, Philippines - Patay ang usa ka trabahante sa Philippine Daily Inquirer samtang usa usab ang samaran human ang gisakyan nilang van misungag sa luyong bahin sa usa ka nag-parking nga Prime mover daplin sa dalan pasado alas tres sa kaadlawon sa barangay Lagundi lungsod sa Oslob kagahapong adlawa.
Ang namatay mao si Meluardo Sumicao, 39, temporaryong nagpuyo sa barangay Abono syudad sa Lapulapu ug usa ka helper sa PDI samtang ang samaran mao si Butch Catipay Cristuta, 60, molupyo sa barangay Tipolo syudad sa Mandaue nga drayber sa maong kompanya.
Samtang natanggong na sa karsel sa kapolisan sa maong lungsod ang drayber sa Prime mover nga si Rufo Delvo ug Cristuta kinsa nakaangkon usab og ginagmay’ng samad ug bukol tungod sa aksidente human matambali.
Base sa imbestigasyon sa kapolisan sa lungsod sa Oslob nasayran nga luwan ang mga biktima sa kolor green nga Mitsubishi L300 van nga adunay plakang TPH-518 padulong sa Bato-Oslob aron maghatud og newspaper.
Sumala pa sa imbestigasyon nga adunay gikasugat nga laing sakyanan si Cristuta maong gikabig niini ang manobela padaplin apan wala niini mabantayi ang Prime mover nga nagtangag sa plakang RCA-560 nga miresulta sa ilang pagkabangga.
Si Sumicao kinsa diha sa tupad ni Cristuta maoy nagrabehan tungod kay sa natungod ang lubot sa maong trak.
Ang duruha gidali og dala sa Oslob District Hospital apan gideklarar nga dead on arrival si Sumicao.
Apan ang duruha nabuhi-an ra usab sa diha nga ang tag-iya sa Prime mover nga si Larry Estacion mipasalig nga maoy moabaga sa pinansyal nga panginahanglanon sa namatay. (BANAT NEWS)