Hubog napaig sa sunog

CEBU, Philippines - Abo nang napalgan ang usa ka lalaki human kini malakip og kasunog sulod sa ilang panimalay sa sitio Capangdanan barangay Tominjao lungsod sa Daan Bantayan kagahapon sa kaadlawon.

Ang biktima mao si Gerrardo Tajadlangit, molupyo sa maong lugar kinsa giingong hubog dihang gibiyaan sa iyang asawang si Annabelle.

Sa imbestigasyon sa kapolisan sa lungsod sa Daanbantayan base sa pamahayag sa asawa ni Tajadlangit nga sa wala pa mahitabo ang insidente iyang gibiyaan ang iyang bana tungod sa ilang panaglalis.

Matud pa ni Annabelle ngadto sa kapolisan hubog ang bana niini ug aron makalikay nga makulatahan sama sa naandan niining himuon kun mahubog didto nalang siya nagpagabii sa panimalay sa iyang ugangan.

Apan sa dihang nahibalik na siya sa ilang panimalay nianang pagkabuntag naugdaw na kini ug gituohan niyang naapil ang iyang bana hinungdan nga dali niyang gipahibalo ang kapolisan.

Sa pakighinabi sa Banat News kang PO2 Henry Compuesto mibutyag kini base usab sa gisulti sa asawa sa biktima nga posibleng nasikaran sa bana ang lamparilya nga maoy ilang gigamit isip suga sa ilang panimalay.

Matud pa ni Compuesto nga ginama sa mga gaay nga materyales ang panimalay hinungdan nga dali ra kaayo kining gikaon sa kalayo. (BANATNEWS)