Nagsapupo sa tiyan ang nurse namatay

CEBU, Philippines - Nagsapupo pa sa tiyan ug nagdagan ang usa ka rehistradong nurse dihang uwahing nakit-ang buhi sa mga residente diha sa sudlonong bahin sa sitio Baho, A. Lopez sa barangay Calamba sa miaging alas 10 pasado sa gabii.

Dead on Arrival (DOA) sa Cebu City Medical Center si Jay Padilla, 38, minyo, registered nurse ug nagpuyo sa Katipunan St,. sa barangay Tisa ning dakbayan.

Si PO2 Cristobal Geronimo sa Homicide Section miingon nga nakita nalang ang biktima sa mga traysikad drayber sa dapit nga nagdagan ug nangayog panabang samtang nagsampong sa iyang tiyan nga dunay dinunggaban.

Ang mga traysikad drayber nga maoy nakakita mao nay midala kaniya sa tambalanan ginamit sab ang traysikad apan gideklarar sa mga doktor nga patay nang daan nga nahiabot ang biktima. Gihulagway sa kapulisan nga dako-dako ug lawom kaayo ang samad sa biktima hinungdan nga kini namatay.

Ang biktima dunay anak babaye nga nagpangidaron 11 anyos, naghilak intawon human nasayod sa hitabo. Ang asawa sa biktima nga usa sab ka registered nurse atua sa gawas sa nasud.

Hangtud karun wala pay mitumaw nga saksi nga nagtudlo kinsay mga responsable sa krimen, apan base sa report sa Buena Mano kagahapon giingong gitabangan ang biktima og mga tawo sa wala pa kini madunggabi. Ang maong lugar giingong naghitak ang pagpayuhot sa ginadiling drugas. (BANATNEWS)