Sibilyan nag-unang violator sa gun-ban

CEBU, Philippines - Sagad sa mga nadakpan ug nakuhaan sa mga armas nga walay mga lisensya mga sibilyan atol sa kapin duha ka buwang pagpatuman sa Comelec gun ban tungod sa gipahigayon nga barangay and SK election sa milabay’ng Oktobre 25.

Matud pa sa hepe sa kapolisan sa lalawigan sa Sugbo Sr. Supt. Erson Digal nga sugod niadtong Septiyembre 25 hangtod sa tungang gabii sa Nobiyembre 11 nakasakmit sila og 45 ka mga armas.

Ang 24 niini pulos high powered guns samtang ang 21 ang low- powered guns. Adunay 34 ka tawo ang ilang nadakpan ug napulo niini ang napasakaan na og kaso samtang ang 21 gipaubos pa usab sa imbestigasyon.

Gani kagahapong adlawa sa kataposang adlaw sa Comelec gun ban aduna usab nasakmit nga armas ang kapolisan sa lungsod sa Balamban nga gisulod sa usa ka box sa motorsiklo nga gipanag-iya sa bag-ohay lang nga napiling barangay kagawad nga si Jonathan Lape sa barangay Apilis.

Sa pakighinabi sa Banat News ni SPO3 Arvie Banate usa ka Dwight Carmelotes nga nagsakay og motorsiklo ang ilang gisitar apan napakyas pagpakita sa rehistro ug nananghid nga mopauli aron pagkuha niini apan wala na mobalik.

Tungod niini ilang gidala ang motorsiklo ug gisusi ang U-box niini sa scooter ug ilang nakita ang kalibre .38 nga paltik ug upat ka buhing bala, diha nila nakita sa rehistro sulod sa U-box nga iya kini ni Lape.

Matud pa ni Banate si Lape miduaw kagahapong adlawa sa ilang buhatan ug miingon nga gihulman ni Carmelotes ang iyang motorsiklo apan wala siya masayod kabahin sa maong armas.

Ang Cebu City Police Office (CCPO) nakasakmit og 31 ka nagkalain-laing armas pagsugod sa election period niadtong Septiyembre 25 nga gilangkuban sa unom ka high-powered firearms samtang 25 ka low-powered nga armas ug 33 ka mga tawo ang nadakpan ug gikasuhan, sagad niini mga sibilyan samtang usa lamang ang nadakpan nga sakop sa Philippine National Police (PNP).

Si Sr. Supt. Melvin Ramon Buenafe, hepe sa CCPO ug si Digal parehong miingon nga magpadayon gihapon ang ilang random checkpoints ilabi na sa kagabhion lakip na ang police visibility tungod sa nagsingabot nga Kapaskuhan.  - Lesley Caminade  (BANAT NEWS)