French, kapuyo naanod sa baha
DUMAGUETE CITY, Philippines - Usa ka French national ug ang kapuyo niining Pilipina nabanlas sa baha kagahapon sa buntag didto sa spillway sa Ocoy River sa barangay Cambukad, lungsod sa Valencia, Negros Oriental.
Ang mga biktima giila sa mga polis nga si Russel Harvey, 60, ug Genara Cua, 56, mga residente sa barangay Caidiocan, sa nahisgutang lungsod.
Sa imbestigasyon sa kapolisan ang mga biktima nagsakay sa ilang multicab nga paingon unta ngadto sa lungsod sa Sibulan samtang padayon ang walay hunong nga ulan.
Apan paghiabot nila sa spillway naanod ang ilang sakyanan sa kusog kaayong baha ug natagak ngadto sa lawom nga bahin sa sapa.
Ang mga residente sa lugar misuway og tabang sa mga biktima apan napakyas kini tungod sa kangitngit sa maong dapit.
Ang patay’ng lawas ni Harvey didto na mapalgi sa lungsod sa Sibulan samtang hangtud sa pagsuwat ning balita wala pa mapalgi ang lawas ni Cua.
Si Raquel Gallopin, kapitan sa barangay Palinpinon nagkanayon nga matag tuig kung dunay baha dili gyud masipyat nga dunay mamatay sa nahisgutang spillway. - Syril G. Repe ug John DX Lapid (BANAT NEWS)
- Latest
- Trending
