CEBU, Philippines - Pahugtan sa kapolisan ang seguridad dinhi sa dakbayan sa Sugbu ug sa lalawigan tungod sa pagbisita ni Presidente Benigno Simeon ‘Noynoy’ Aquino III karong adlawa.
Kini maoy ikaduhang pagbisita dinhi sa Sugbu ni Aquino human siya midaog niadtong eleksyon sa Mayo ug karung buntag unahon pag-adto sa presidente ang lungsod sa Balamban diin siya maoy pinasidunggang dinapit sa Tsuneishi aron pagpangalan sa usa ka barko.
Pagkahuman niini mobalik siya dinhi sa dakbayan ug modiretso sa SM City Mall alang sa lain na usab nga kalihukan.
Si Sr. Supt. Melvin Ramon Buenafe, hepe sa Cebu City Police Office (CCPO) mopakatap siya og daghang police sa kadalanan aron masigurong hapsay ang pag-agi sa presidente gikan sa tugpahanan sa Cebu International Airport Authority (MCIAA).
Kagahapon sa hapon si Police Regional Office-7 director Ager Ontog Jr. pangulo sa kapulisan sa Central Visayas mimando na og security arrangement sa presidente.
Samtang adunay iandam nga Crowd Dispersal Management teams batok sa mga militanteng moprotesta ug gimandoan ang Asturias ug Tuburan Police Stations lakip na kasikbit nga dapit sa Balamban sa pagbutang og checkpoints.
Dugang polis usab gikan sa Provincial Public Safety Battalion ang ipakatap ni Sr. Supt. Erson Digal sa lalawigan tungod sa maong kalihukan. – BANAT NEWS