CEBU, Philippines - Gipusil patay ang usa ka manager human kini gisulod sa iyang computer shop sa nagbinugtong nga mamumuno kagahapon sa ala-una sa kaadlawon diha sa sitio Cabancalan 2 sa barangay Bulacao dakbayan sa Sugbu.
Si Jomar Obinar, 34, general manager sa Wel Gadget Prone Trading nahiagom og samad pinusilan sa ulo nga maoy nakaingon sa hinanali niining kamatayon. Ang biktima nanag-iya usab og internet café sa nahisgutang lugar.
Segun sa imbestigasyon sa kapulisan sa dakbayan nga paingon nang manirado ang biktima sa iyang computer shop, sa dihang wala mailhing tawo ang kalit nga mitunga ug mipusil ni Obinar sa ulo nga nahagba ug namatay dihadiha dayon.
Ang Homicide Section sa Cebu City Police Office (CCPO), Pardo Police Station ug Crime Scene Investigation (CSI) wala makarekober og basiyo sa armas ug nagtuo ang kapulisan nga rebolber ang gigamit sa pagpusil.
Ang Homicide Section padayong misusi sa hitabo tungod kay wala pa usab silay nahuptang mga saksi nga makatudlo ug makahulagway sa mga gikatahapan lakip na sa motibo sa pagpusil patay kang Obinar.
Si PO3 Victor Ayuman sa Homicide Section nga nahinabi sa Banat News pinaagi sa telepono miingon nga wala pa silay lead sa maong hitabo sanglit wala pa usab silay nahinabi nga mga tagtungod sa biktima. – BANAT NEWS