Milugos sa 17 anyos nga dalagita gipasakaan na og kaso

CEBU, Philippines - Gipasaka na kagahapon sa hapon ang kasong rape batok sa suspetsadong milugos sa usa ka 17 anyos nga dalagita didto sa lungsod sa Consolacion sa miaging adlaw.

Kini ang gibutyag ni PO3 Alin Garciano sa pakighinabi sa Banat News kagahapon.

Sayo niini giila sa biktima nga ang milugos kaniya mao si Jason Estopa Omaña.

Didto kini mahitabo sa barangay Poblacion Occidental sa maong lungsod.

Sa pakighinabi sa Banat News ni PO1 Nilon Lech Suico usa sa mga mirespondeng polis, nasayran nga   gitaptapan ang mga mata sa biktima ug gipahigda kini sa suspetsado dihang gipahimuslan ang iyang pagkababaye.

Matud pa ni Suico nga human sa pagpahimulos, gibiyaan ra usab sa suspetsado ang biktima, busa nakahigayon kini sa pagsumbong ngadto sa kapolisan.Gihulagway ni Suico nga human nila madawat ang reklamo sa biktima, giadto dayon nila ang suspetsado sa balay niini.

Hinuon wala kini magdumili sa pagkuyog sa kapolisan ngadto sa ilang buhatan diin didto positibo siyang giila sa biktima.

Mibutyag usab si Suico nga ang uyab sa biktima nga si Abner Mantigue ug ang suspetsado mag-agaw.

Kasamtangan karong nagtingkagol sa prisohan ang suspetsado. (BANATNEWS)