Mga sundawo gipabaha karon sa lalawigan sa Sugbo

CEBU, Philippines - Gibutangan karon og daghang sundawo ang dakbayan ug probinsya sa Sugbo nunot sa hulga sa terorista dinhi sa nasud.

Kini maoy gipahibawo ni Lt. Col. Romeo Brawner, kanhi tigpamaba sa Armadong Kusog sa Pilipinas ug karon maoy pangulo sa 2nd Special Forces Battalion nga nagbase didto sa lalawigan sa Bohol.

Si Brawner nga nahinabi sa Banat News mibutyag nga niadtong unang semana ning bulana iyang gi-deploy ang gatosan ka mga sundawo sa dakbayan ug probinsya sa Sugbo nga sakop sa 2nd Special Forces Battalion.

Si Brawner kinsa mi-courtesy call kang Sr. Supt. Melvin Ramon Buenafe kagahapon sa buntag mitataw nga ang hulga sa terorista dili dinhi sa Pilipinas kundili sa ubang kanasuran.

Apan iyang giangkon nga niining gipagawas nga travel advisory sa Germany, United States ug Australia naapektohan gyud ang Pilipinas sanglit daghang mga turistang langyaw ang mobisita dinhi sa Visayas Region.

Si Brawner nagdumili hinuon pagbutyag sa gidaghanon sa mga sundalo nga iyang gi-deploy sa mga lugar dinhi sa dakbayan ug lalawigan sa Sugbo nga anaa sa mga tourist spots aron pagsiguro niining mga lugara.

Matud pa niya nga kining tanan ubos sa kamandoan ni Lt. General Ralph Villanueva, ang hepe sa Central Command ug Lt. Col. Luga nga maoy pangulo sa 802nd Brigade. (BANATNEWS)